Vishal e Sunu,
masculu e fimmina,
iddu vint’anni,
idda dicidottu,
iddu avia l’oru
d’ ‘a casta bramina,
idda la fami
di la cuntadina.

Vishal e Sunu
li cori pirfetti
s’incatinaru
cu fidi ed amuri,
dopu ch’ ‘i sbarri
d’ ‘a casta sirraru
iddi si vasanu
senza timuri.

Nuddu ci potti
ne Siva e ne Sakti,
ne Visnu ne Brahma,
ne Krishna e ne Buddha,
pi li du’ cori
putiri spartiri
e di li casti
l’onuri salvari.

Ora pi curpa
di li ginituri
ca l’accusaru
a li capi d’ ‘a casta
iddi criparu
‘mpiccati nta chiazza
cu l’occhi di fora
e nta vucca schiumazza.

Vishal e Sunu
ora fannu l’amuri
a la facciazza
di li ginituri
di li bramini
e di li casti indiani
granni virgogna
du duemilaeunu.