Versi e musica di Mauro Geraci; foto tratte dai siti web
La vera munnizza è cchiù fitusa d'a munnizza
La vera munnizza non è scartu di manciati
La vera munnizza non è chiusa nte sacchetti
La vera munnizza non s'ammassa nta li strati
La vera munnizza non s'abbrucia cu lu focu
La vera munnizza non sta dintra i cassonetti
La vera munnizza non s'a mancianu li cani
La vera munnizza havi bianchi li culletti
La vera munnizza non su' sulu l'ecoballi
La vera munnizza non fa puzza nta li chiani
La vera munnizza non è chidda di la spisa
La vera munnizza dintra SUV ed ariuplani
La vera munnizza è lu cchiù veru invistimentu
La vera munnizza è 'u capitali ed è l'imprisa
La vera munnizza doppi petti, occhiali niri
La vera munnizza di st'Italia è la prummisa
La vera munnizza 'a vidi a destra ed a sinistra
La vera munnizza è nta lu centru e non si viri
La vera munnizza havi la cruci nta li petti
La vera munnizza è a tutti 'i banni unni ti giri
La vera munnizza cu li camion non si cogghi
La vera munnizza e non c'è cu si dimetti
La vera munnizza si presenta all'elezioni
La vera munnizza non c'è nuddu ch'i manetti
La vera munnizza comu scrissi Saramagu
La vera munnizza oggi sunnu Tutti i Nomi
La vera munnizza oggi sunnu i Presidenti
La vera munnizza è la camorra e i prestanomi
La vera munnizza di sciacallu havi li denti
La vera munnizza nni guverna e nni macina
La vera munnizza trasi nta la nostra testa
La vera munnizza la vutamu nta cabina
La vera munnizza ogni ghiornu è na gran festa
La vera munnizza nni svacanta li sacchetti
La vera munnizza fa campagni eletturali
La vera munnizza luttu e morti nni prumetti
La vera munnizza nta pulitica e l'industria
La vera munnizza è lu cementu ca nni strinci
La vera munnizza è lu gran ponti supra 'u Strittu
La vera munnizza è la TAV ca non convinci
La vera munnizza è la mafia di l'appalti
La vera munnizza cu s'a mancia cu pitittu
La vera munnizza latri 'i Statu e petrolieri
La vera munnizza 'm Parlamentu 'nchiana drittu
La vera munnizza suffucau lu nostru Statu
La vera munnizza si manciau tutti i pinseri
La vera munnizza supra 'i schermi e li giurnali
La vera munnizza Santi, Papi e Cavaleri
La vera munnizza e ci vulissi un terremotu
La vera munnizza e ci vulissi la murali
La vera munnizza e ci vulissi lu sapiri
La vera munnizza e nni vidissimu 'u finali...