Fazzu mea culpa miei cari signori
ca scarsu sugnu comu cantastori,
è veru sì ca ci desi la vuci
sulu a li poviri e a li Cristi 'n cruci.

E cu sta storia ca ora vi mannu
di pirdunarimi a tutti addumannu,
non più barbuna, sfruttati e precari,
cantu li drammi d'un parlamintari.

D'i sacrifici di sti puvareddi
nuddu nni parra e si scorcia la peddi,
'a prufissioni ci levanu manu
pi fari 'u beni d'u Statu 'talianu.

Chi gran tristizza a la sira su' suli,
li diputati e li sinaturi,
- "Mugghieri mia a Roma haju a stari
si vaju 'o cinema l'hajiu a pagari.

E li telefuni e telefunini
pi chistu gratis avissimu aviri,
e pi sembrari all'Italia cchiù seri
massaggi gratis e puru 'u varberi.

'O Parlamentu ogni ghiornu è 'na 'mprisa,
'nn avemu tempu di fari la spisa,
comu a Natali pi li mindicanti
vulemu gratis li risturanti.

All'Alitalia onuri facemu,
supra l'aerei gratis vulamu
e pi sfatari qualsiasi 'ntrallazzu
puru nte treni nun pagamu un cazzu.

Tra na manciata ed un tagghiu 'i capiddi
di lu travagghiu nui semu li stiddi,
la busta paga havi a essiri licca,
vintimiliuna pi mia sunnu picca.

Doppu ddu anni di sta vita amara
tutta 'a pinsioni la vulemu para,
tantu oggi giornu c'a flessibilità
la sò pinsioni cchiù nuddu l'avrà" -.

Ora lu cori mi sentu cchiù leggiu
ca desi vuci a cu' è nta lu seggiu,
pi sigritariu cc'avissiru a dari
puru l'amanti od un figghiu macari.

E pi la notti megghiu ripusari
farei na liggi p'i parlamintari
c'hannu bisognu pi lu sò rizzettu
'na fimminedda 'zziccata 'nto lettu.
 

Mauro Geraci
geraci@mclink.it
http://www.geracicantastorie.it