MALAFIGURA SICILIANA
Versi e musica di Mauro Geraci

Dimmi 'nzoccu ti passa pi la testa
ca ti lu giuru non lu cantu a nuddu,
dimmi picchì non voi cchiù fari festa
'nzemi a li bravi genti di lu Sud,
dimmi Sicilia picchì di luntanu
ti copri l'occhi e 'a vucca cu li manu.

Si non sì grata dillu a li to figghi,
chiddi chi pi bannera ti purtaru.
Fidiricu lu Svevu li cunsigghi
forsi ti dava megghiu di Cuffaru,
ca 'ngrassa, fa 'ngrassari e non capisci
ca cu stu pisu schiatta Colapisci?

Cala Sicilia,
cala nto funnu,
tu nun si cchiù
lu viddicu d'u munnu!

Lu pisu è troppu forti e non rispiri
ca supra cc'hai li figghi assatanati,
pari na matri ca jetta suspiri
senza valia di dari timpulati,
e nta stu mentri i figghi siciliani
ti spurpanu li ossa comu cani.

Li cchiù mafiusi sunnu li dutturi,
i medici  c'a testa di scarpara,
ogni pazienti un votu e cu primura
di clinichi privati a cintinara,
Cuffaru proj li nostri capitali
e cimiteri restanu 'i 'spitali.

Cala Sicilia,
cala cchiù a funnu,
ca non si cchiù
lu viddicu d'u munnu.

Sicilia ma picchì non mi rispunni
quannu ti parru di sti situazioni,
quannu ti dicu jetta ammenzu l'unni
li clientelismi e 'i raccumannazioni,
ti dissi e ti ripetu via stu mantu
niru com'un paisi senza cantu.

E s'iddu non c'è cchiù Leunardu Sciascia,
'Mpastatu, Dolci, Fava e Vitturini,
non vogghiu ca ti chiudi nta la cascia
sutta a lupara di li tò assassini.
Vuci e chitarra ti li dugnu allura
ma scansa a Melu Freni ed a Cullura.

Cala Sicilia,
cala nto funnu,
tu non si cchiù
lu viddicu d'u munnu.

Non ci la fazzu cchiù di stu ritardu,
non ci la fazzu cchiù di stari mali,
ci sputu supra di lu Gattupardu
e supra 'i tia ca scinni li scali.
Sicilia 'nzoccu dicu lu capisci:
si canci pi canciari si finisci!

Finisci 'u sprecu, 'u pizzu e la mazzetta,
la 'ntisa, 'u parentami e 'a curruzioni,
triunfa lu dirittu e cchiù curretta
diventa 'a liggi cu l'istituzioni.
Crepa Sicilia si non canci rutta
'ddumannu 'a luci dintra la tò grutta.

Cala Sicilia,
cala nto funnu,
tu non sì cchiù
lu viddicu d'u munnu.

Ti pregu non diventi comu 'u Nord
c'u Muvimentu di l'Autunumia,
cu stu partitu megghiu non t'allordi
e tratti a tutti cu dimucrazia,
senza mafiusi, riccuna e precari,
pani e travagghiu a tutti pari pari.

Ferma li fiumi di li capitali
ca Don Totò ci duna a li sò amici,
nimici toi, nimici elitturali
ca la tò testa calanu nta pici,
ma si ti levi 'i supra stu catrami
Sicilia senza ponti 'n celu acchiani.

Cala Sicilia,
cala nto funnu,
tu no  sì cchiù
lu viddicu d'u munnu.