BALLATA VINCITRICE DEL II TROFEO TURIDDU BELLA, 2003

per leggere la motivazione collegati al sito http://www.cstb.it e vai alla voce "trofeo", "vincitori 2003"

Lu tempu di l’autunnu è friddu scuru,
a li campagni chiovi di cuntinu
ma nta li strati a rullu di tamburu
lu cantastori passa a capu chinu
e canta un fatto ca successi a Lenu
unni chiuviu lu sangu di lu celu.

Russu, duratu, duci comu meli,
lu sangu cula di na stidda chiara
ca cu chidda di Marta e Samueli
nni faci lustru comu la lampara.
Quattordici anni avia sta virginedda
morsi scannata a corpa di cutedda.

Lu capu di lu brancu Nicu era,
li denti ci l’avia com’un cinghiali,
l’occhi sarbaggi ca paria na fera
ma a scola era sceccu di tistali.
A sidici anni vulia fari ‘u guappu
ma era curtu e siccu com’un tappu.

Sutta di iddu poi c’era Mattia,
quattordici anni e non seppi squartari
all’innumani 'u corpu a la campia
e non lu seppi mancu sutterrari.
E mentri a li so amici lu cuntava
li cavusi di sutta si cacava.

Ma ‘u figghiu cchiù bastardu era Nicola
ca setti cutiddati cafuddau,
prima a li rini e poi dintra la gola
picchì a picciotta d’iddu si schifiau,
e viulintata di ddi tri bistiuna
strisciava ‘n terra comu lu scursuna.

Ora si dici ca fu n’omu granni
veru rigista di tutta la scena
ma lu populu ‘ncorna a tutti li banni
comu lu toru chiusu ‘nta l’arena,
‘ncorna, s’ammatti e paci cchiù non trova
non cridi a chiddu chi giustizia prova.

Tri ghiommari di fimmina e sei minni
non pottiru addivari a ddi tri lupi,
ca ‘u latti ci fu datu di cu vinni
a lu guvernu pi farisi 'i pupi,
tagghiannucci a li figghi lu cordoni
pi cullegalli a la tilivisioni.

La matri ci scipparu ed ogni sira
guerri, tangenti, buttani e palluni,
davanti ‘u vidiugiocu comu pira
sti figghi c’hannu 'a fami d' 'i liuni.
‘Ccussì tra na fumata ed un cafè
li carni ci manciaru a Desirè.