AVIARIA
la vendetta dei polli
Versi e musica di mauro Geraci

Havi assai ca si dici nte chiazzi
ca l'industria di oggi è tiranna,
dintra li capannuna e li stazzi
a li polli ci duna cunnanna.

Cincucentu nto 'n metru quatratu
pi manciari di dannu munnizza,
lu cudduzzu ci l'hannu stiratu
pi bivirisi d'acqua 'na stizza.

Li jaddini assai su' 'ncazzati,
ai patruna mittissiru 'a prova,
stritti comu li sardi salati,
notti e ghiornu a cacari li ova.

Ma ora basta ! Lu vasu trabbucca,
la prutesta nto munnu s'inciamma,
la jaddina fa comu la mucca
nesci pazza e la lotta cumanna...

VULATI D'I JARGI PALUMMI E TACCHINI,
L'AVIARIA SPARGITI CU LI PUDDICINI,
CCHIU' FORTI GRIDATI: "H5N1!
CA CCA' COCCODE' NUN LU FA CCHIU' NESSUNU!"

NON FATI CCHIU' OVA PUDDASTRI E JADDINI,
LU VOSTRU PUTIRI NON HAVI CUNFINI,
TRIMENNA VINNITTA L'AVITI A GIURARI
CA L'OMINI L'OVA S''I PONNU CACARI.

Lu mircatu di l'avicultura
persi 'u sceccu cu tutti 'i carrubbi,
di lu pollu la genti ha paura
non nni mancia e non havi cchiù dubbi.

E l'industria ristò a labbra asciutti
quannu visti 'u prufittu calari,
lu puddami na vota pi tutti
la sò storia la vosi canciari.

Picchì l'omu dai tempi di Adamu
tagghia testi di jaddi e jaddini,
ma lu ventu ha spizzatu lu ramu
e lu versu d''i carnificini.

Manu a manu l'esercitu vola
supra tutti li cieli d''a terra,
pi vinnitta na sula parola,
tutti i polli ora gridanu: "Guerra!!"

JADDINI, PUDDASTRI RUMPITI 'I FILIERI,
LU VOSTRU DULURI E' STORIA D'AIERI,
D'AVIARIA SPARGITI L'ANTICU RANCORI
CA LASSA DIJUNI ARENA E AMADORI!

VACANTI E' LU PIATTU DI TUTTA LA GENTI,
NE' MUCCA, NE' POLLU DA ORIENTI A OCCIDENTI,
SENZ'OVA CI CALA LU COLESTEROLU,
PI PRANZU E PI CENA C'ARRESTA UN CITROLUUUUUUUUUU!!!


PRESTISSIMO SU QUESTA PAGINA LA VERSIONE CANTATA DA ME...